कविता: भुँईचालो

कविता: भुँइचालो स्रष्टा: क्षेत्र 'प्रेम' मुखिया फेरि आज उसको छातीभित्र केही उद्वेलित भयो, बौराई उठ्यो उनि वर्षौंको निस्तब्धता तोड़ेर | तिम्रो आयामको के दुख्न गयो? शायद मानवको असिमित आकांक्षाको तृप्ति हेतु खोतालिएको तिम्रो छाती, आफ्नो महल ठडाउँन नाश गरेको ती सृष्टिका हरिया वातावरण, स्रष्टाले सृजेका जीव-जन्तुको त्रास, अझ समुद्रभित्र पनि निज मंथन गर्ने प्रवृतिले असर पार्यो तिमिलाई ! हो ! असर पार्यो तिमिलाई ! आफै भित्र पहाड़ पर्वत, वन जंगल, महासागर समाहित गर्ने हरेक कुरो अविचलित भई सहेर वहन गर्ने, अवश्य आहत भयो तिमीलाई निश्चित आहत भयो तिमी ! गर्भभित्र समाहित असह्य पीड़ालाई सुम्सम्याउँदा आराम न हुँदा शायद हिक्का फुटाउन प्रश्वास फेर्यो तिमीले, मर्म सेक्न सानो कोल्टे फेर्यो तिमीले, अनि भयो हलचल यहाँ केही क्षण हो ! केवल केही क्षण ! तर यो केही क्षणमा भएको विनाश रामायणको युद्ध भन्दा कम थिएन, महाभारतको संग्राम भन्दा सानो थिएन, विश्वयुद्धको महासंहार भन्दा थोरै थिएन | तिमीले आफ्नो निस्तब्धता तोड्यो तर यहाँ मानव निशब्द भएका छ, केवल क्रन्दन/विलापको स्वर गुञ्जयमान छन् | दिवास्वप्न जस्तै भएको छ सबै अघि सम्म अस्तित्वमा रहेका कुरो अहिले अस्तितवविहिन भएको छ, अघि सम्म आफ्नो उपस्थिति देखाउने अहिले केवल अवशेष मात्र रहेको छ, शताब्दी सम्म ठड़िएको नौ-तले धरहरा क्षणमै धररररर.......गरि ढहेको छ, यत्र-तत्र केवल त्रासदीको माहौल छ, जीर्ण-शीर्ण स्वरूप लिएर | हो ! हामीबाट भुल भएको छ तर मानवको दुखमा हामी मानवता भुल्न सक्दैनौ, छरिएको लाश माथि उभिएर हामी हाँस्न सक्दैनौ | सयौं मानिसको प्राण लिएका छौ, तिम्रो आतंक वहन गर्ने, वरण गर्ने सामर्थ्य छैन हामीमा, पिड़ित छौ हामी, विक्षिप्त छौ हामी तिम्रो अघोषित/असंतुष्ट उथुल पुथुलको कोप भाजन भएका छौं हामी | तिम्रो त्यो शरीरको घाव/चर्किएको जमीन छिट्टै भर्न सक्छ तर, हाम्रो मानसपटलमा छापिएको तिम्रो विनाश र आतंकको घाव भर्न शायद सयौं वर्ष लाग्ने छ, शायद सयौं वर्ष लाग्ने छन् | क्षेत्र 'प्रेम' मुखिया सिलीगुड़ी , भारत

---

हार्दिक समवेदना

गत बैशाख १२ गते गएको विनाशकारी महाभुकम्पमा परी ज्यान गुमाउने सम्पूर्ण नेपाली दाजु-भाई, दिदी-बहिनीहरूको मृत आत्माको चिर शान्तिको कामना गर्दै हार्दिक श्रद्धान्जली अर्पण गर्दछौँ। र सोही प्राकृतिक प्रकोपका कारण घाइते हुनुभएका, आफन्त गुमाउनुहुने र घरबार विहिन भएकाहरू प्रति हार्दिक समवेदना प्रकट गर्दछौँ।

शब्दाङ्कुर साहित्य सञ्जाल

sahityikchautari@gmail.com

प्रधान सम्पादक:

सालिक राम 'जिउँदो सालिक'

Click here to find Salik Ram on Facebook.